Тӑвай округӗнчи Енӗш Нӑрваш шкулӗнчи пӑтӑрмах пирки Чӑваш халах сайчӗ унччен пӗлтернӗччӗ-ха. Аса илтерер: унти юлашки шӑнкӑрав вӑхӑтӗнче 10-мӗш класра вӗренекен пӗр хӗрача тухса калаҫнӑ чухне ӑна директор тата хӑш-пӗр учитель кӳрентернине пӗлтернӗ. Видеона тӗнче тетелне вырнаҫтарнӑ хыҫҫӑн шкулта прокуратура тӗрӗслев пуҫарнӑ.
Чӑваш Ен Патшалӑх Канашӗн депутачӗ Александр Андреев пӑтӑрмах хыҫҫӑн республикӑн Вӗренӳ министерствине ҫыру ҫырнӑ. Унтисем ӑна хуравланӑ тӑрӑх, шкул директорӗ Раиса Иллариронова ӗҫрен пӑрахма ыйтса заявлени ҫырнӑ иккен, ҫӗртме уйӑхӗн 3-мӗшӗнчен вӑл директор пуканне пушатнӑ.
10-мӗш класс хӗрачипе тата унпа пӗр класра вӗренекенсемпе калаҫу ирттернӗ-мӗн. Шкулта вӗренме ачасене хӑтлӑ пултӑр тесе ҫӗнӗ вӗренӳ ҫулӗнче те тӗрлӗ ӗҫ туса ирттересшӗн-мӗн.
Чӑваш патшалӑх ӳнер музейӗн директорне, Чӑваш Енри художниксен союзӗн пайташне Геннадий Козлова «Чӑваш Республикин халӑх художникӗ» ят панӑ.
Геннадий Васильевич, - педагогика наукисен кандидачӗ, Пӗтӗм тӗнчери психологи наукисен академийӗн член-корреспонденчӗ.
Вӑл Тӑвай районӗнчи Вӑрманхӗрри ялӗнче 1962 ҫулта ҫуралнӑ. И.Я. Яковлев ячӗллӗ Чӑваш патшалӑх педагогика институтӗнчи (халӗ университет) ӳнерпе графика факультетӗнчен вӗренсе тухнӑ. 1992 ҫултанпа асӑннӑ аслӑ шкулта живопись кафедрин доценчӗ пулса ӗҫлеме тытӑннӑ. Шупашкарти ӳнер музейӗн директорӗ пулса 2003 ҫултанпа тӑрӑшать.
Ҫитес вӑхӑтра республикӑра икӗ плотинӑна юсама палӑртнӑ. Гидроузелсене упраса хӑварни ял хуҫалӑхӗшӗн пӗлтерӗшлӗ.
Тӑвай округӗнчи Тӑрмӑш ялӗ ҫывӑхӗнчи пӗвене тата Комсомольски округӗнчи Кӗҫӗн Ҫӗрпӳелпе Йӑвашкел ялӗсен хушшинчи Кӗҫӗн Пӑла юханшывӗ ҫинчи плотинӑна юсӗҫ.
Ӗҫсене ҫитес вӑхӑтра тытӑнмалла.
Паян Тӑвай округӗнче «Ялта чи лайӑххисем» агрослет иртнӗ. Кӑҫал унта пӗрремӗш хут федерацин Атӑлҫи округӗнчи мӗнпур регион хутшӑннӑ.
Слета 1,6 пин ытла ҫын ҫитнӗ. Кӑҫал йӑлана кӗнӗ мероприятие Аслӑ Ҫӗнтерӳ пулнӑранпа 80 ҫул ҫитнине халалланӑ, вӑл «Ҫӗнтерӗве пӗрле кӗтсе илер» лозунгпа иртнӗ.
Ӗҫлӗ программӑра 4 тема пулнӑ: «Ку пирӗн ҫемьен», «2025 – муниципалитет депутачӗн ҫулталӑкӗ», «Ҫӗнтерӗве пӗрле кӗтсе илетпӗр», «Агропродакшн: ялти паллӑ блогер мӗнле пулмалла».
Прокуратура Тӑвай округӗнчи Енӗш Нӑрваш шкулӗнче мӗн пулса иртнине тӗрӗслӗ.
Сӑлтавӗ акӑ мӗнре: юлашки шӑнкӑравра шкулта 10-мӗш класра вӗренекен пӗр хӗрача тухса калаҫнӑ чухне ӑна директор тата хӑш-пӗр учитель сӑмахсемпе кӳрентернине пӗлтернӗ. Видеона тӗнче тетелне вырнаҫтарнӑ. Ӑна Интернет хӑрушсӑрлӑхӗн лигин пуҫлӑхӗ Екатерина Мизулина асӑрханӑ.
Кӑҫал кӗркунне Ҫӗрпӳри аграри-технологи тухникумӗ 100 гектар ҫӗр ҫинче хӑмла лартӗ. Тӳрех палӑртса хӑвӑрар: республика кӑҫал хӑмла ӳстерессине аталантарма 130 миллион ытла тенкӗ уйӑрнӑ. Ҫавӑн пекех грантсем, пӗтӗмпе 140 миллион ытла тенкӗ, парӗҫ.
Хӑмла лартмалли лаптӑка сухаланӑ ӗнтӗ. Ҫулла унта шпалерсем вырнаҫтарӗҫ, кӗркунне вара 330 пин хунав лартӗҫ. 80 гектарӗ – Тӑвай округӗнче пулӗ. Патӑрьел тата Ҫӗрпӳ округӗсенче – 10-шар гектар.
Пӗлтӗрхи авӑн уйӑхӗн 15-мӗшӗнче Тӑвай районӗнчи Тӗмер ялӗнче пушарта пӗчӗк ача вилнине республикӑри массӑлла информаци хатӗрӗсем хыпарланӑччӗ-ха.
Инкек сӑлтавне тӗпчевҫӗсем тӗплӗн тишкернӗ хыҫҫӑн пушар мӗнрен тухнине палӑртнӑ.
Ачасен асламӑшӗ (тен, кукамӑшӗ-тӗр, вырӑсла «бабушка» тенӗ) килӗнче 2, 3 тата 4 ҫулхи мӑнукӗсемпе пулнӑ. Вӗсене пӳртре хӑварса кил картине тухнӑ, унта вӑл болгаркӑпа вутӑ татма тытӑннӑ. Ҫавӑн чухне инструментӑн пӑралукне астумасӑр татса пӑрахнӑ. Унтан вӑл ӑна изолентӑпа чӗркесе хунӑ та малалла ӗҫленӗ. Ҫавӑн чухне пӳртре кӗске замыкани пулса илнӗ, пушар тухнӑ.
Аслӑрах ачасене хӗрарӑм пӳртрен илсе тухма ӗлкӗрнӗ, вӗсем пиҫсе кайнӑ, кӗҫӗнни вара сӗрӗмпе наркӑмӑшланса вилнӗ.
Вӑрмар округӗнче пурӑнакан арҫын вӑрманта пӗве туса хунӑ. Халӗ куншӑн явап тытма тивӗ.
Арҫын Канаш лесничествин Тӑвай участок лесничествинче котлован чавнӑ. Ҫапла вӑл тӑпран пулӑхлӑ сийне сиенлетнӗ, виҫӗ юмана тӗп тунӑ. Патшалӑха кӳнӗ тӑкак 98 пин те 362 тенкӗ те 8 пуспа танлашнӑ.
Вӑрман инспекторӗсем тӗрӗслев ирттернӗ хыҫҫӑн материалсене полицие панӑ.
Астӑвӑр: вӑрманта мӗн те пулин тӑвас тӑк малтан официаллӑ майпа калаҫса татӑлмалла.
Тӑвай тӑрӑхӗнчи Элпуҫ ялӗнчи Агафия Алексеева 100 ҫул тултарнӑ.
Кинемее ҫав кунпа саламлама вырӑнти тӳре-шара пырса ҫитнӗ. Вӗсем Раҫҫей Президенчӗн Владимир Путинӑн салам открыткине те илсе пынӑ, парнепе савӑнтарнӑ.
Укахви 16 ҫулта амӑшӗсӗр тӑрса юлнӑ. Колхозра ӗҫленӗ, окоп чавма тухса кайнӑ. Унтан кайӑк-кӗшӗк фабрикинче, типографире тӑрӑшнӑ, колхоз садӗнче бригадирта тимленӗ, ҫӑкӑр пӗҫерекен те пулнӑ.
Агафия Ильиничнӑн икӗ ача, 5 мӑнук, мӑнукӗсен сакӑр ача.
Пуш уйахӗн 26-мӗшӗнче, ӗнер, Тӑвай окургӗнчи Енӗш Нӑрваш ялӗнче 63 ҫулти арҫын пушарта ҫунса вилнӗ.
Ҫулӑм 70 тӑваткал метр лаптӑк ҫинче алхаснӑ. Пушара 9 ҫӑлавҫӑ, икӗ техника сӳнтернӗ.
«Хӗрлӗ автана» парӑнтарсан кил хуҫин виллине тупнӑ. Вӑл килте пӗччен пурӑннӑ.
Палӑртмалла: пӗр талӑкра 4 пушар пулнӑ. Ҫав шутран пӗри – типӗ курӑк ҫуннӑ тӗслӗх.
-11.7 °C